ਪੰਜਾਬ ’ਚ ਹੜ੍ਹਾਂ ਕਾਰਨ ਹਾਲੇ ਵੀ ਮਾੜੇ ਹਾਲਾਤ
ਕਪੂਰਥਲਾ, ਸੁਲਤਾਨਪੁਰ ਲੋਧੀ, ਫਿਰੋਜ਼ਪੁਰ - ਪੰਜਾਬ ’ਚ ਲਗਾਤਾਰ ਤਿੰਨ ਦਿਨ ਪਏੇ ਮੀਂਹ ਕਰਕੇ ਦਰਿਆ ਸਤਲੁਜ ਅਤੇ ਬਿਆਸ ਵਿੱਚ ਪਾਣੀ ਦਾ ਪੱਧਰ ਵਧਣ ਕਰਕੇ ਹੜ੍ਹ ਦੇ ਮਾੜੇ ਹਾਲਾਤ ਬਣੇ ਹੋਏ ਹਨ। ਦਰਿਆਵਾਂ, ਚੋਆਂ ਅਤੇ ਹੋਰ ਬਰਸਾਤੀ ਨਾਲਿਆਂ ’ਚ ਪਾਣੀ ਦਾ ਪੱਧਰ ਵਧਣ ਕਾਰਨ ਇਨਾਂ ਨੇੜੇ ਪੈਂਦੀ ਜ਼ਮੀਨ ’ਚ ਫਸਲਾਂ ਪਾਣੀ ਦੀ ਮਾਰ ਹੇਠ ਆ ਗਈਆਂ ਹਨ। ਫੌਜ ਜੰਗੀ ਪੱਧਰ ਉਪਰ ਕਪੂਰਥਲਾ, ਜਲੰਧਰ, ਮੋਗਾ ਅਤੇ ਫ਼ਿਰੋਜ਼ਪੁਰ ਜ਼ਿਲ੍ਹਿਆਂ ’ਚ ਬਚਾਅ ਕਾਰਜਾਂ ’ਚ ਲੱਗੀ ਰਹੀ। ਫ਼ੌਜ ਦੇ ਇਕ ਬੁਲਾਰੇ ਨੇ ਦੱਸਿਆ ਕਿ ਫ਼ੌਜੀ ਜਵਾਨ ਨੇ 33 ਮੋਟਰ ਕਿਸ਼ਤੀਆਂ ਨਾਲ ਲੋਕਾਂ ਦੀ ਮਦਦ ਕੀਤੀ।
ਪੰਜਾਬ ਦੇ ਮੁੱਖ ਸਕੱਤਰ ਸ. ਰਮੇਸ਼ਇੰਦਰ ਸਿੰਘ ਨੇ ਦੱਸਿਆ ਕਿ ਰਾਜ ਵਿੱਚ ਆਏ ਇਨ੍ਹਾਂ ਹੜ੍ਹਾਂ ਕਾਰਨ ਇਕ ਲੱਖ ਏਕੜ ਜ਼ਮੀਨ ਪ੍ਰਭਾਵਿਤ ਹੋਈ ਹੈ, ਜਿਸ ਤੋਂ ਪਾਣੀ ਲੰਘਿਆ ਹੈ ਜਾਂ ਖੜ੍ਹਾ ਹੈ। ਉਨ੍ਹਾਂ ਦੱਸਿਆ ਕਿ ਕੇਂਦਰ ਸਰਕਾਰ ਨੂੰ ਹੜ੍ਹਾਂ ਕਾਰਨ ਹੋਏ ਨੁਕਸਾਨ ਦਾ ਜਾਇਜ਼ਾ ਲੈਣ ਲਈ ਜੋ ਵਿਸ਼ੇਸ਼ ਟੀਮਾਂ ਭੇਜਣ ਸਬੰਧੀ ਮੰਗ ਭੇਜੀ ਗਈ ਸੀ, ਉਸ ’ਤੇ ਕਾਰਵਾਈ ਕਰਦਿਆਂ ਕੇਂਦਰ ਵੱਲੋਂ ਜਲਦੀ ਹੀ ਵਿਸ਼ੇਸ਼ ਟੀਮ ਪੰਜਾਬ ਭੇਜੇ ਜਾਣ ਦੀ ਸੰਭਾਵਨਾ ਹੈ। ਹੜ੍ਹਾਂ ਕਾਰਨ ਕੋਈ 125 ਪਿੰਡ ਪ੍ਰਭਾਵਿਤ ਹੋਏ ਹਨ, ਜਿਨ੍ਹਾਂ ਵਿਚੋਂ 25 ਪਿੰਡਾਂ ਦਾ ਨੁਕਸਾਨ ਜ਼ਿਆਦਾ ਹੋਇਆ ਹੈ। ਹੜ੍ਹਾਂ ਕਾਰਨ ਕੋਈ 14 ਮੌਤਾਂ ਦੀ ਪੁਸ਼ਟੀ ਹੋਈ ਹੈ, ਪ੍ਰੰਤੂ ਰਾਜ ਦੇ ਮਾਲ ਵਿਭਾਗ ਵੱਲੋਂ ਆਪਣੇ ਤੌਰ ’ਤੇ ਇਕੱਤਰ ਕੀਤੀ ਜਾ ਰਹੀ ਜਾਣਕਾਰੀ ਅਨੁਸਾਰ ਹੜ੍ਹਾਂ ਕਾਰਨ ਰਾਜ ਵਿਚ ਮਰਨ ਵਾਲੇ ਲੋਕਾਂ ਦੀ ਗਿਣਤੀ 26 ਤੋਂ ਵੱਧ ਹੈ।
ਭਾਵੇਂ ਦਰਿਆਵਾਂ ’ਚ ਪਾਣੀ ਦਾ ਪੱਧਰ ਲਗਾਤਾਰ ਘੱਟ ਰਿਹਾ ਹੈ ਪ੍ਰੰਤੂ ਅਜੇ ਵੀ ਪ੍ਰਭਾਵਤ ਪਿੰਡਾਂ ਵਿੱਚ ਸਥਿਤੀ ਗੰਭੀਰ ਬਣੀ ਹੋਈ ਹੈ ਕਿਉਂਕਿ ਜਮਾਂ ਹੋਏ ਪਾਣੀ ਦਾ ਨਿਕਾਸ ਬਹੁਤ ਹੌਲੀ ਹੌਲੀ ਹੋ ਰਿਹਾ ਹੈ। ਰਾਜ ਵਿੱਚ ਮਹਾਂਮਾਰੀ ਫੈਲਣ ਦਾ ਖਤਰਾ ਬਣਿਆ ਹੋਇਆ ਹੈ। ਹਜ਼ਾਰਾਂ ਏਕੜ ਰਕਬੇ ’ਚ ਖੜੀ ਫ਼ਸਲ ਬਰਬਾਦ ਹੋ ਗਈ ਹੈ, ਉਥੇ ਪਾਣੀ ’ਚ ਘਿਰੇ ਪਰਿਵਾਰਾਂ ਦੇ ਕੱਚੇ ਅਤੇ ਪੱਕੇ ਮਕਾਨ ਧੜਾ-ਧੜ ਢਹਿ-ਢੇਰੀ ਹੋ ਰਹੇ ਹਨ, ਜਿਸ ਕਾਰਨ ਸੈਂਕੜੇ ਪਰਿਵਾਰ ਛੱਤ ਹੀਣ ਹੋ ਗਏ, ਜੋ ਪਾਣੀ ਦੇ ਵਿਚਕਾਰ ਬਣੇ ਟਾਪੂ ਰੂਪੀ ਸੁਰੱਖਿਅਤ ਸਥਾਨਾਂ ’ਤੇ ਪਨਾਹ ਲਈ ਬੈਠੇ ਹਨ, ਜਿਨ੍ਹਾਂ ਨੂੰ ਜਿੱਥੇ ਭਵਿੱਖ ਦੀ ਚਿੰਤਾ ਸਤਾਉਣ ਲੱਗੀ ਹੈ, ਉਥੇ ਉਹ ਵੱਖ-ਵੱਖ ਰੋਗਾਂ ਦੀ ਲਪੇਟ ’ਚ ਵੀ ਆ ਚੁੱਕੇ ਹਨ। ਸਰਕਾਰੀ ਦਾਅਵਿਆਂ ਦੇ ਉਲਟ ਲੋਕ ਨਿਰਾਸ਼ਾ ਅਤੇ ਗ਼ੁਰਬਤ ਦੇ ਮਾਹੌਲ ’ਚ ਰਹਿ ਰਹੇ ਹਨ।
ਪੰਜਾਬ ਦੇ ਮੁੱਖ ਮੰਤਰੀ ਸ: ਪ੍ਰਕਾਸ਼ ਸਿੰਘ ਬਾਦਲ ਨੇ ਹੜ੍ਹ ਨਾਲ ਪ੍ਰਭਾਵਤ ਇਲਾਕਿਆਂ ਦਾ ਦੌਰਾ ਕੀਤਾ ਅਤੇ ਕਿਹਾ ਹੈ ਕਿ ਹੜ੍ਹ ਨਾਲ ਪ੍ਰਭਾਵਿਤ ਇਲਾਕਿਆਂ ਵਿੱਚ ਹੋਏ ਫਸਲੀ ਅਤੇ ਹੋਰ ਨੁਕਸਾਨ ਲਈ ਪੀੜਤ ਲੋਕਾਂ ਨੂੰ ਢੁੱਕਵਾਂ ਮੁਆਵਜ਼ਾ ਦਿੱਤਾ ਜਾਵੇਗਾ। ਮੁੱਖ ਮੰਤਰੀ ਨੇ ਕਿਹਾ ਹੈ ਕਿ ਸਰਕਾਰ ਕੋਲ ਹੜ੍ਹ ਪੀੜਤਾਂ ਦੀ ਸਹਾਇਤਾ ਲਈ ਫੰਡਾਂ ਦੀ ਕੋਈ ਕਮੀ ਨਹੀਂ ਹੈ ਅਤੇ ਉਨ੍ਹਾਂ ਨੇ ਸਬੰਧਿਤ ਅਧਿਕਾਰੀਆਂ ਨੂੰ ਹੜ੍ਹ ਪੀੜਤ ਪਰਿਵਾਰਾਂ ਨੂੰ ਹਰ ਸੰਭਵ ਮਦਦ ਦੇਣ ਲਈ ਕਿਹਾ ਹੈ। ਸ਼੍ਰੋਮਣੀ ਅਕਾਲੀ ਦਲ਼ ਦੇ ਪ੍ਰਧਾਨ ਸੁਖਬੀਰ ਸਿੰਘ ਬਾਦਲ ਨੇ ਵੀ ਹੜ੍ਹ ਦੀ ਮਾਰ ਹੇਠ ਆਏ ਇਲਾਕਿਆਂ ਦਾ ਦੌਰਾ ਕੀਤਾ ਅਤੇ ਪ੍ਰਭਾਵਿਤ ਲੋਕਾਂ ਨੂੰ ਢੁੱਕਵਾਂ ਮੁਆਵਜ਼ਾ ਦੇਣ ਦੀ ਗੱਲ ਕਹੀ। ਸੁਖਬੀਰ ਬਾਦਲ ਨੇ ਪਾਰਟੀ ਦੇ ਆਗੂਆਂ ਅਤੇ ਵਰਕਰਾਂ ਨੂੰ ਹੜ ਦੀ ਮਾਰ ਹੇਠ ਆਏ ਇਲਾਕੇ ਵਾਸੀਆਂ ਦੀ ਯੋਗ ਸਹਾਇਤਾ ਕਰਨ ਦੀ ਗੱਲ ਕਹੀ।

ਨਵੀਂ ਦਿੱਲੀ - ਦੇਸ਼ ਦੇ 62 ਸੁਤੰਤਰਤਾ ਦਿਵਸ ਮੌਕੇ ਅਜ਼ਾਦੀ ਜਸ਼ਨਾ ਤੋਂ ਠੀਕ ਇਕ ਦਿਨ ਪਹਿਲਾਂ ਯੂ. ਪੀ. ਏ. ਗਠਜੋੜ ਵਾਲੀ ਕਾਂਗਰਸ ਸਰਕਾਰ ਨੇ ਦੇਸ਼ ਦੇ 50 ਲੱਖ ਤੋਂ ਵੱਧ ਕੇਂਦਰ ਸਰਕਾਰ ਅਧੀਨ ਕੰਮ ਕਰਦੇ ਮੁਲਾਜ਼ਮਾਂ ਦੀ ਤਨਖ਼ਾਹ ’ਚ ਅੰਦਾਜ਼ਨ 21 ਫ਼ੀਸਦੀ ਦੇ ਵਾਧੇ ਦਾ ਐਲਾਨ ਕੀਤਾ। ਇਹ ਵਾਧਾ ਇਕ ਜਨਵਰੀ, 2006 ਤੋਂ ਲਾਗੂ ਹੋਵੇਗਾ। ਪ੍ਰਧਾਨ ਮੰਤਰੀ ਡਾ. ਮਨਮੋਹਨ ਸਿੰਘ ਦੀ ਪ੍ਰਧਾਨਗੀ ਹੇਠ ਹੋਈ ਕੇਂਦਰੀ ਮੰਤਰੀ ਮੰਡਲ ਦੀ ਮੀਟਿੰਗ ’ਚ 6ਵੇਂ ਤਨਖ਼ਾਹ ਕਮਿਸ਼ਨ ਦੀਆਂ ਸਿਫ਼ਾਰਸ਼ਾਂ ਨੂੰ ਮਨਜ਼ੂਰੀ ਦਿਤੀ ਗਈ। ਮੀਟਿੰਗ ਮਗਰੋਂ ਸੂਚਨਾ ਅਤੇ ਪ੍ਰਸਾਰਣ ਮੰਤਰੀ ਪ੍ਰਿਯਰੰਜਨ ਦਾਸ ਮੁਨਸ਼ੀ ਨੇ ਇੱਥੇ ਪੱਤਰਕਾਰਾਂ ਨੂੰ ਦਸਿਆ ਕਿ ਤਨਖ਼ਾਹ ’ਚ ਕੀਤੇ ਵਾਧੇ ਨਾਲ ਕੇਂਦਰ ’ਤੇ ਸਾਲਾਨਾ 17798 ਕਰੋੜ ਰੁਪਏ ਜਦਕਿ ਬਕਾਏ ਦੀ ਅਦਾਇਗੀ ਨਾਲ ਕੇਂਦਰ ’ਤੇ 29373 ਕਰੋੜ ਦਾ ਵਾਧੂ ਭਾਰ ਪਵੇਗਾ। ਇਸੇ ਤਰ੍ਹਾਂ ਏਰੀਅਰ (ਬਕਾਇਆ) ਜਨਵਰੀ 2006 ਤੋਂ ਅਗਸਤ, 2008 ਲਈ ਦੋ ਕਿਸ਼ਤਾਂ ’ਚ ਦਿਤਾ ਜਾਵੇਗਾ। ਚਾਲੂ ਵਿੱਤੀ ਵਰ੍ਹੇ ਦੌਰਾਨ ਏਰੀਅਰ ਦਾ 40 ਫੀਸਦੀ ਅਤੇ 2009-10 ’ਚ ਏਰੀਅਰ ਦੀ 60 ਫੀਸਦੀ ਅਦਾਇਗੀ ਕੀਤੀ ਜਾਵੇਗੀ। ਨਵੀਂ ਤਨਖ਼ਾਹ ਇਕ ਸਤੰਬਰ, 2008 ਤੋਂ ਮੁਲਾਜ਼ਮਾਂ ਨੂੰ ਮਿਲੇਗੀ। ਦਾਸਮੁਨਸ਼ੀ ਨੇ ਦਸਿਆ ਕਿ ਸਰਕਾਰ ਨੇ ਕੇਂਦਰੀ ਮੁਲਾਜ਼ਮਾਂ ਦੀ ਘਟੋ-ਘੱਟ ਤਨਖ਼ਾਹ 7 ਹਜ਼ਾਰ ਰੁਪਏ ਤੈਅ ਕੀਤੀ ਹੈ ਜਦਕਿ ਜਸਟਿਸ ਬੀ. ਐਨ. ਸ੍ਰੀਕ੍ਰਿਸ਼ਣ ਦੀ ਪ੍ਰਧਾਨਗੀ ਵਾਲੇ ਤਨਖ਼ਾਹ ਕਮਿਸ਼ਨ ਨੇ 6660 ਰੁਪਏ ਪ੍ਰਤੀ ਮਹੀਨਾ ਘਟੋ-ਘੱਟ ਤਨਖ਼ਾਹ ਦੀ ਸਿਫ਼ਾਰਸ਼ ਕੀਤੀ ਸੀ। ਤਨਖ਼ਾਹ ਕਮਿਸ਼ਨ ਨੇ ਇਸ ਸਾਲ ਮਾਰਚ ਵਿੱਚ ਸਰਕਾਰ ਨੂੰ ਅਪਣੀ ਰੀਪੋਰਟ ਸੌਂਪੀ ਸੀ। ਇਸ ਤਰ੍ਹਾਂ ਸੱਭ ਤੋਂ ਹੇਠਲੇ ਪੱਧਰ ਦੇ ਮੁਲਾਜ਼ਮਾਂ ਨੂੰ ਭੱਤੇ ਮਿਲਾ ਕੇ 10 ਹਜ਼ਾਰ ਰੁਪਏ ਤੋਂ ਵੱਧ ਤਨਖ਼ਾਹ ਅਤੇ ਭੱਤਾ ਮਿਲੇਗਾ। ਸਰਕਾਰ ਨੇ ਸਾਲਾਨਾ ਇਨਕ੍ਰੀਮੈਂਟ ਨੂੰ ਵੀ ਢਾਈ ਫੀਸਦੀ ਤੋਂ ਵਧਾ ਕੇ ਤਿੰਨ ਫੀਸਦੀ ਕਰ ਦਿਤਾ ਹੈ। ਰਖਿਆ ਖੇਤਰ ’ਚ ਕੈਬਨਿਟ ਨੇ ਸਾਰੇ ਸੁਰੱਖਿਆ ਮੁਲਾਜ਼ਮਾਂ ਅਤੇ ਗ਼ੈਰ ਫ਼ੌਜੀ ਮੁਲਾਜ਼ਮਾਂ ਲਈ ਸੋਧੀ ਹੋਈ ਯਕੀਨੀ ਕੈਰੀਅਰ ਤਰੱਕੀ ਸਕੀਮ ਤਹਿਤ ਤਿੰਨ ਪੱਕੇ ਪ੍ਰਮੋਸ਼ਨਾਂ ਨੂੰ ਮਨਜ਼ੂਰੀ ਦਿੱਤੀ ਹੈ। ਗ਼ੈਰ ਫ਼ੌਜੀ ਮੁਲਾਜ਼ਮਾਂ ਨੂੰ 10, 20 ਅਤੇ 30 ਸਾਲ ਦੀ ਸੇਵਾ ’ਤੇ ਤਰੱਕੀ ਮਿਲੇਗੀ ਜਦਕਿ ਰਖਿਆ ਫ਼ੋਰਸਾਂ ’ਚ ਜਵਾਨਾਂ ਨੂੰ 8, 16 ਅਤੇ 24 ਸਾਲ ’ਤੇ ਤਰੱਕੀ ਦਿੱਤੀ ਜਾਵੇਗੀ। ਕਮਿਸ਼ਨ ਦੀਆਂ ਸਿਫ਼ਾਰਸ਼ਾਂ ਮੁਤਾਬਕ ਕੇਂਦਰ ਸਰਕਾਰ ਦੇ ਮੁਲਾਜ਼ਮਾਂ ਨੂੰ 1 ਜਨਵਰੀ, 2006 ਤੋਂ ਰੀਵਾਈਂਡ ਪੇ ਸਕੇਲ ਦਿੱਤਾ ਜਾਵੇਗਾ। ਮੁਲਾਜ਼ਮਾਂ ਦੀ ਤਨਖ਼ਾਹ ਘਟੋ-ਘੱਟ 10 ਹਜ਼ਾਰ ਰੁਪਏ ਹੋਵੇਗੀ। ਪਹਿਲੀ ਕਿਸ਼ਤ ’ਚ ਬਕਾਏ ਦੀ 40 ਫੀਸਦੀ ਅਦਾਇਗੀ ਕਾਰੋਬਾਰੀ ਸਾਲ 2009 ’ਚ ਦਿਤੀ ਜਾਵੇਗੀ ਅਤੇ ਬਾਕੀ ਰਕਮ ਕਾਰੋਬਾਰੀ ਸਾਲ 2010 ਵਿਚ ਦਿਤੀ ਜਾਵੇਗੀ। ਦਾਸਮੁਨਸ਼ੀ ਨੇ ਦਸਿਆ ਕਿ ਤਨਖ਼ਾਹ ਕਮਿਸ਼ਨ ਦੀਆਂ ਸਿਫ਼ਾਰਸ਼ਾਂ ਨੂੰ ਲਾਗੂ ਕਰਨ ਨਾਲ ਆਮ ਬਜਟ ’ਤੇ 15717 ਕਰੋੜ ਰੁਪਏ ਦਾ ਅਸਰ ਪਵੇਗਾ ਜਦਕਿ ਰੇਲ ਬਜਟ ’ਤੇ 6414 ਕਰੋੜ ਰੁਪਏ ਦਾ। ਸਰਕਾਰ ਦਾ ਮੌਜੂਦਾ ਤਨਖ਼ਾਹ ਬਿੱਲ 70 ਹਜ਼ਾਰ ਕਰੋੜ ਰੁਪਏ ਤੋਂ ਵੱਧ ਹੈ ਜਦਕਿ ਪੈਨਸ਼ਨ ਬਿੱਲ 30 ਹਜ਼ਾਰ ਕਰੋੜ ਰੁਪਏ ਤੋਂ ਵੱਧ ਹੈ।
ਜ਼ਿਕਰਯੋਗ ਹੈ ਕਿ ਜਸਟਿਸ ਸ੍ਰੀਕ੍ਰਿਸ਼ਣ ਦੀ ਪ੍ਰਧਾਨਗੀ ਹੇਠ 6ਵੇਂ ਤਨਖ਼ਾਹ ਕਮਿਸ਼ਨ ਦਾ ਗਠਨ ਕੀਤਾ ਗਿਆ ਸੀ। ਕਮਿਸ਼ਨ ਨੇ ਰਖਿਆ ਮੁਲਾਜ਼ਮਾਂ ਲਈ ਪੁਰਾਣੀ ਤਨਖ਼ਾਹ ’ਚ 1.74 ਫੀਸਦੀ ਦੇ ਵਾਧੇ ਦੀ ਸਿਫ਼ਾਰਸ਼ ਕੀਤੀ ਸੀ ਪਰ ਇਸ ਸਿਫ਼ਾਰਸ਼ ’ਤੇ ਰਖਿਆ ਮਾਮਲਿਆਂ ਨਾਲ ਜੁੜੇ ਲੋਕਾਂ ਨੇ ਤਸੱਲੀ ਜ਼ਾਹਰ ਨਹੀਂ ਸੀ ਕੀਤੀ। ਸੰਭਾਵਤ ਸਿਫ਼ਾਰਸ਼ਾਂ ਮੁਤਾਬਕ ਐਲ. ਸੀ. ਸੀ. ਮੁਲਾਜ਼ਮ ਨੂੰ, ਜਿਸ ਦੀ ਬੇਸਿਕ ਤਨਖ਼ਾਹ 2700 ਤੋਂ 4400 ਰੁਪਏ ਤੱਕ ਹੈ, ਨੂੰ ਹੁਣ 7500 ਤੋਂ 12500 ਰੁਪਏ ਮਿਲਣਗੇ। ਉਥੇ ਹੀ ਯੂ. ਜੀ. ਸੀ. ਮੁਲਾਜ਼ਮ, ਜਿਸ ਦੀ ਤਨਖ਼ਾਹ 4000 ਤੋਂ 9000 ਦੇ ਵਿਚਕਾਰ ਹੈ, ਨੂੰ ਹੁਣ 10 ਹਜ਼ਾਰ ਤੋਂ 22 ਹਜ਼ਾਰ 500 ਰੁਪਏ ਮਿਲਣਗੇ। ਨਾਨ ਗਜ਼ਟਿਡ ਸਟਾਫ਼, ਜਿਨ੍ਹਾਂ ਦੀ ਬੇਸਿਕ ਤਨਖ਼ਾਹ 6 ਹਜ਼ਾਰ ਤੋਂ 10 ਹਜ਼ਾਰ 500 ਰੁਪਏ ਦੇ ਵਿਚਕਾਰ ਹੈ, ਨੂੰ ਹੁਣ 15 ਹਜ਼ਾਰ ਤੋਂ 27 ਹਜ਼ਾਰ ਰੁਪਏ ਮਿਲਣਗੇ। ਸੈਕਸ਼ਨ ਅਫ਼ਸਰਾਂ ਨੂੰ 6500 ਤੋਂ 12000 ਦੀ ਬਜਾਏ ਹੁਣ 17,500 ਤੋਂ 30,500 ਰੁਪਏ ਮਿਲਣਗੇ। ਅਧੀਨ ਸਕੱਤਰ ਲੈਵਲ ਦੇ ਅਧਿਕਾਰੀ ਨੂੰ 10 ਹਜ਼ਾਰ ਤੋਂ 15 ਹਜ਼ਾਰ 850 ਦੀ ਬਜਾਏ 25 ਹਜ਼ਾਰ ਤੋਂ 40 ਹਜ਼ਾਰ ਰੁਪਏ ਤਕ ਮਿਲਣਗੇ। ਇਸੇ ਤਰ੍ਹਾਂ ਡਿਪਟੀ ਸਕੱਤਰ ਦਾ ਸਕੇਲ ਵੀ ਹੁਣ 12 ਹਜ਼ਾਰ ਤੋਂ 18,300 ਰੁਪਏ ਦੀ ਬਜਾਏ 30 ਹਜ਼ਾਰ ਤੋਂ 48 ਹਜ਼ਾਰ ਰੁਪਏ ਤੱਕ ਹੋਵੇਗਾ। ਜੇ ਤਨਖ਼ਾਹ ਕਮਿਸ਼ਨ ਦੀਆਂ ਸਿਫ਼ਾਰਸ਼ਾਂ ਨੂੰ ਇਸੇ ਤਰ੍ਹਾਂ ਲਾਗੂ ਕੀਤਾ ਜਾਂਦਾ ਹੈ ਤਾਂ ਇਸ ਸਾਲ ਸਰਕਾਰੀ ਖ਼ਜ਼ਾਨੇ ’ਤੇ ਲਗਭਗ 8 ਹਜ਼ਾਰ ਕਰੋੜ ਦਾ ਵਾਧੂ ਭਾਰ ਪਵੇਗਾ।

ਸ਼੍ਰੋਮਣੀ ਅਕਾਲੀ ਦਲ ਨੇ ਜ਼ਿਲ੍ਹਾ ਪ੍ਰਧਾਨਾਂ ਦੇ ਨਾਂਅ ਐਲਾਨੇ
ਚੰਡੀਗੜ੍ਹ - ਇੱਥੇ ਪਾਰਟੀ ਦੇ ਮੁੱਖ ਦਫਤਰ ਤੋਂ ਸ਼੍ਰੋਮਣੀ ਅਕਾਲੀ ਦਲ ਦੇ ਪ੍ਰਧਾਨ ਅਤੇ ਐਮ.ਪੀ. ਸ: ਸੁਖਬੀਰ ਸਿੰਘ ਬਾਦਲ ਨੇ ਪੰਜਾਬ ਦੇ ਵੱਖ- ਵੱਖ ਜ਼ਿਲ੍ਹਿਆਂ ਦੇ ਪ੍ਰਧਾਨਾਂ ਦੇ ਨਾਵਾਂ ਦਾ ਐਲਾਨ ਕਰ ਦਿੱਤਾ। ਇਹ ਐਲਾਨ ਉਨ੍ਹਾਂ ਨੇ ਪਾਰਟੀ ਨੂੰ ਮਜ਼ਬੂਤ ਅਤੇ ਪਾਰਟੀ ਦੀਆਂ ਸਰਗਰਮੀਆਂ ਨੂੰ ਤੇਜ਼ ਕਰਨ ਲਈ ਕੀਤਾ ਹੈ। ਖਾਸ ਗੱਲ ਇਹ ਰਹੀ ਕਿ ਫਤਿਹਗੜ੍ਹ ਸਾਹਿਬ, ਮੋਗਾ, ਪਟਿਆਲਾ (ਦਿਹਾਤੀ), ਸੰਗਰੂਰ, ਬਰਨਾਲਾ, ਫਰੀਦਕੋਟ, ਅਤੇ ਮੁਹਾਲੀ ਜ਼ਿਲ੍ਹਿਆਂ ਦੇ ਪ੍ਰਧਾਨ ਨਵੇਂ ਬਣਾਏ ਗਏ ਹਨ। ਜਦੋਂਕਿ ਅੰਮ੍ਰਿਤਸਰ (ਸ਼ਹਿਰੀ) ਅਤੇ ਕਪੂਰਥਲਾ ਦੇ ਪ੍ਰਧਾਨਾਂ ਦੇ ਨਾਂਅ ਬਾਅਦ ਵਿੱਚ ਜਾਰੀ ਕੀਤੇ ਜਾਣਗੇ।
ਪਾਰਟੀ ਦੇ ਸਕੱਤਰ ਅਤੇ ਬੁਲਾਰੇ ਡਾ: ਦਲਜੀਤ ਸਿੰਘ ਚੀਮਾ ਨੇ ਦੱਸਿਆ ਕਿ ਪਹਿਲਾਂ ਦੀ ਤਰ੍ਹਾਂ ਡਾ: ਰਤਨ ਸਿੰਘ ਅਜਨਾਲਾ ਅੰਮ੍ਰਿਤਸਰ (ਦਿਹਾਤੀ), ਸ: ਸਿਕੰਦਰ ਸਿੰਘ ਮਲੂਕਾ ਬਠਿੰਡਾ, ਸ: ਜਨਮੇਜਾ ਸਿੰਘ ਸੇਖੋਂ ਫਿਰੋਜ਼ਪੁਰ, ਸ: ਸੁੱਚਾ ਸਿੰਘ ਲੰਗਾਹ ਗੁਰਦਾਸਪੁਰ, ਸ: ਸੁਿਰੰਦਰ ਸਿੰਘ ਠੇਕੇਦਾਰ ਹੁਸ਼ਿਆਰਪੁਰ, ਸ: ਅਜੀਤ ਸਿੰਘ ਕੋਹਾੜ ਜਲੰਧਰ (ਦਿਹਾਤੀ) ਅਤੇ ਸ: ਗੁਰਚਰਨ ਸਿੰਘ ਚੰਨੀ ਜਲੰਧਰ (ਸ਼ਹਿਰੀ) ਦੇ ਪ੍ਰਧਾਨ ਹੋਣਗੇ। ਇਸੇ ਤਰ੍ਹਾਂ ਸ: ਸੰਤਾ ਸਿੰਘ ਉਮੈਦਪੁਰ ਲੁਧਿਆਣਾ ਦਿਹਾਤੀ, ਸ: ਹੀਰਾ ਸਿੰਘ ਗਾਬੜੀਆ ਲੁਧਿਆਣਾ (ਸ਼ਹਿਰੀ), ਸ: ਹਰਬੰਤ ਸਿੰਘ ਦਾਤੇਵਾਸ ਮਾਨਸਾ, ਸ: ਮਨਜੀਤ ਸਿੰਘ ਬਰਕੰਦੀ ਮੁਕਤਸਰ, ਸ: ਮਹਿੰਦਰ ਸਿੰਘ ਹੁਸੈਨਪੁਰ ਨਵਾਂਸ਼ਹਿਰ, ਸ਼੍ਰੀ ਹਰਸ਼ ਸਰੀਨ ਨਵਾਂਸ਼ਹਿਰ (ਸ਼ਹਿਰੀ), ਸ: ਇੰਦਰਮੋਹਨ ਸਿੰਘ ਬਜਾਜ ਪਟਿਆਲਾ (ਸ਼ਹਿਰੀ), ਮਾਸਟਰ ਤਾਰਾ ਸਿੰਘ ਲਾਡਲ ਰੋਪੜ ਅਤੇ ਸ: ਅਲਵਿੰਦਰਪਾਲ ਸਿੰਘ ਪੱਖੋਕੇ ਤਰਨ ਤਾਰਨ ਦੇ ਪ੍ਰਧਾਨ ਹੋਣਗੇ।
ਜਿਹੜੇ 7 ਨਵੇਂ ਜ਼ਿਲ੍ਹਾ ਪ੍ਰਧਾਨ ਬਣਾਏ ਗਏ ਹਨ, ਉਨ੍ਹਾਂ ਵਿਚ ਫਤਹਿਗੜ੍ਹ ਸਾਹਿਬ ਤੋਂ ਸ: ਜਗਦੀਪ ਸਿੰਘ ਚੀਮਾ, ਬਰਨਾਲਾ ਤੋਂ ਸੰਤ ਬਲਬੀਰ ਸਿੰਘ ਘੁੰਨਸ, ਸੰਗਰੂਰ ਤੋਂ ਗਿਆਨੀ ਰਘਬੀਰ ਸਿੰਘ, ਫਰੀਦਕੋਟ ਤੋਂ ਸ. ਮਨਤਾਰ ਸਿੰਘ ਬਰਾੜ, ਮੋਗਾ ਤੋਂ ਸ: ਤੀਰਥ ਸਿੰਘ ਮਾਹਲਾ, ਮੁਹਾਲੀ ਤੋਂ ਜਥੇਦਾਰ ਉਜਾਗਰ ਸਿੰਘ ਵਡਾਲੀ ਅਤੇ ਪਟਿਆਲਾ (ਦਿਹਾਤੀ) ਤੋਂ ਸ: ਅਜੈਬ ਸਿੰਘ ਮੁਖਮੈਲਪੁਰ ਦੇ ਨਾਂਅ ਸ਼ਾਮਿਲ ਹਨ।

ਨਵੀਂ ਦਿੱਲੀ - ਇਕ ਨਿਜੀ ਟੀਵੀ ਚੈਨਲ ਨੂੰ ਦਿੱਤੀ ਇੰਟਰਵਿਊ ਵਿੱਚ ਬਾਲੀਵੁੱਡ ਅਦਾਕਾਰਾ ਤੇ ਸਮਾਜ ਸੇਵੀ ਸ਼ਬਾਨਾ ਆਜ਼ਮੀ ਨੇ ਦੇਸ਼ ਦੀ ਰਾਜਨੀਤੀ ਉਪਰ ਤਗੜਾ ਵਾਰ ਕਰਦਿਆਂ ਹੋਇਆ ਦੋਸ਼ ਲਗਾਇਆ ਹੈ ਕਿ ਦੇਸ਼ ਦੀ ਰਾਜਨੀਤੀ ਵਿੱਚ ਮੁਸਲਮਾਨਾਂ ਦੇ ਨਾਲ ਵਿਤਕਰਾ ਵਰਤਿਆ ਜਾਂਦਾ ਹੈ। ਉਨ੍ਹਾਂ ਨੇ ਕਿਹਾ ਕਿ ਮੁਸਲਮਾਨਾਂ ਦੀ ਦਸ਼ਾ ਸੁਧਾਰਨ ਦੇ ਲਈ ਸਿਰਫ਼ ਗੱਲਾਂ ਹੀ ਕੀਤੀਆਂ ਜਾਂਦੀਆਂ ਹਨ, ਪਰ ਅਸਲ ਮੁੱਦਿਆਂ ਉਪਰ ਧਿਆਨ ਨਹੀਂ ਦਿੱਤਾ ਜਾਂਦਾ ਹੈ।
ਮੁਸਲਿਮ ਨਜ਼ਰੀਏ ਉਪਰ ਵੀ ਨਿਸ਼ਾਨਾ ਲਾਉਂਦੇ ਹੋਏ ਸ਼ਬਾਨਾ ਨੇ ਕਿਹਾ ਕਿ ਉਨ੍ਹਾਂ ਦੀ ਇਸਲਾਮ ਦੇ ਬਾਰੇ ਵਿੱਚ ਗਲਤਫਹਿਮੀ ਦੂਰ ਕਰਨ ਦੀ ਕੋਸ਼ਿਸ਼ ਕਰਾਉਣਾ ਵੀ ਗਵਾਰਾ ਨਹੀਂ ਸਮਝਿਆ। ਉਨ੍ਹਾਂ ਨੇ ਇਹ ਸੁਝਾਅ ਵੀ ਦਿੱਤਾ ਕਿ ਮੁਸਲਮਾਨਾਂ ਨੂੰ ਆਪਣੇ ਮਜ਼ਹਬ ਅਤੇ ਸੰਪਰਦਾਇਕਤਾ ਦੀ ਛਾਪ ਬਦਲਣੀ ਚਾਹੀਦੀ ਹੈ। ਇੰਟਰਵਿਊ ਵਿੱਚ ਜਦੋਂ ਉਨ੍ਹਾਂ ਤੋਂ ਇਹ ਸਵਾਲ ਕੀਤਾ ਗਿਆ ਕਿ ਕੀ ਦੇਸ਼ ਦੀ ਰਾਜਨੀਤੀ ਵਿੱਚ ਮੁਸਲਮਾਨਾਂ ਦੇ ਨਾਲ ਭੇਦਭਾਵ ਹੁੰਦਾ ਹੈ ਤਾਂ ਉਨ੍ਹਾਂ ਨੇ ਇਸ ਦਾ ਜਵਾਬ ਹਾਂ ਵਿੱਚ ਦਿੱਤਾ। ਜਦੋਂ ਉਨ੍ਹਾਂ ਤੋਂ ਪੁਛਿਆ ਗਿਆ ਕਿ ਇਸ ਦੇ ਲਈ ਦੋਸ਼ੀ ਕੌਣ ਹੈ - ਕੋਈ ਵਿਸ਼ੇਸ਼ ਰਾਜ ਨੇਤਾ, ਰਾਜਨੀਤਿਕ ਪਾਰਟੀਆਂ ਜਾਂ ਫਿਰ ਸਿਸਟਮ, ਤਾਂ ਉਨ੍ਹਾਂ ਦਾ ਕਹਿਣਾ ਸੀ ਕਿ ਅਸੀਂ ਹੁਣ ਤੱਕ ਇਸ ਗੱਲ ਨੂੰ ਨਹੀਂ ਸਮਝ ਸਕੇ ਕਿ ਲੋਕਤੰਤਰ ਦੀ ਸਫਲਤਾ ਦੇ ਲਈ ਘੱਟ-ਗਿਣਤੀਆਂ ਦੀ ਸੁਰੱਖਿਆ ਦਾ ਵਿਸ਼ੇਸ਼ ਧਿਆਨ ਰੱਖਣਾ ਪੈਂਦਾ ਹੈ। ਉਨ੍ਹਾਂ ਨੇ ਕਿਹਾ ਕਿ ਮੁਸਲਮਾਨਾਂ ਦੀ ਸਥਿਤੀ ਸੁਧਾਰਨ ਦੇ ਬਾਰੇ ਵਿੱਚ ਸਿਰਫ਼ ਗੱਲਾਂ ਕੀਤੀਆਂ ਜਾਂਦੀਆਂ ਹਨ ਪਰ ਉਹ ਉਸੀ ਸਥਿਤੀ ਵਿੱਚ ਹੈ ਜਿਸ ਦਾ ਬਿਓਰਾ ਸੱਚਰ ਕਮੇਟੀ ਦੀ ਰਿਪੋਰਟ ਵਿੱਚ ਵੀ ਹੈ। ਇਸ ਦੇ ਲਈ ਰਾਜ ਨੇਤਾ ਜ਼ਿੰਮੇਵਾਰ ਹੈ ਅਤੇ ਉਨ੍ਹਾਂ ਲੋਕਾਂ ਨੇ ਮੁਸਲਮਾਨਾਂ ਦੀ ਇਕ ਖਾਸ ਤਰ੍ਹਾਂ ਦੀ ਛਾਪ ਨਿਰਮਿਤ ਕਰ ਦਿੱਤੀ ਹੈ ਜਿਸ ਦੀ ਵਜ੍ਹਾ ਨਾਲ ਉਦਾਰ ਮੁਸਲਮਾਨਾਂ ਦੀ ਆਵਾਜ਼ ਅਣਸੁਣੀ ਰਹਿ ਜਾਂਦੀ ਹੈ। ਉਨ੍ਹਾਂ ਨੇ ਮੁਸਲਮਾਨਾਂ ਉਪਰ ਵੀ ਦੋਸ਼ ਲਗਾਇਆ ਕਿ ਉਹ ਕੱਟੜਪੰਥੀਆਂ ਦੀ ਗੱਲਾਂ ਵਿੱਚ ਬਹਿਕ ਜਾਂਦੇ ਹਨ। ਇਹ ਪੁੱਛਣ ਉਪਰ ਕੀ ਮੁਸਲਮਾਨਾਂ ਦਾ ਆਪਣਾ ਨੇਤਾ ਹੋਣਾ ਚਾਹੀਦਾ ਹੈ, ਸ਼ਬਾਨਾ ਆਜ਼ਮੀ ਨੇ ਕਿਹਾ ਕਿ ਇਹ ਜ਼ਰੂਰੀ ਨਹੀਂ ਹੈ। ਜਵਾਹਰ ਲਾਲ ਨਹਿਰੂ ਮੁਸਲਮਾਨਾਂ ਦੇ ਨੇਤਾ ਸਨ। ਨੇਤਾਵਾਂ ਨੂੰ ਉਨ੍ਹਾਂ ਵਰਗਾ ਹੀ ਹੋਣਾ ਚਾਹੀਦਾ ਹੈ। ਇਸ ਦੇਸ਼ ਵਿੱਚ ਮੁਸਲਮਾਨ ਭੇਦਭਾਵ ਦੇ ਸ਼ਿਕਾਰ ਹਨ।